ពុម្ពអក្សរយូនីកូដខ្មែរចេញថ្មីឆ្នាំ 2013 : Kh SomborPreyKok និង AKbalthom KhmerLer

បាទជម្រាបសួរអ្នកដែលបានចូលមកដល់ទីនេះ ថ្ងៃនេះប្លកអាក្បាលធំមានពុម្ពអក្សរយូនីកូដខ្មែរមួយដែលទើប តម្រៀបហើយ និងពុម្ពអក្សរថ្មីស្នាដៃ របស់កំពូលអ្នកអាយធីស៊ីអំបិល ។ ថ្វីត្បិតខ្ញុំទាំងពីរគ្រឿងនេះអត់ចេះ និងមិនសូវដឹងអំពីការបង្កើតពុម្ពអក្សរយូនីកូដខ្មែរ តែមានទឹកចិត្តចង់រួមចំណែកអភិវឌ្ឍន៍នឹងគេដែរ ដូច្នេះក៏ខំប្រឹងស្រាវជ្រាវ ធ្វើអ្វីដែលអាចធ្វើបាន បើមានកន្លែងណាខុសឆ្គង សូមរាយការណ៍ឲ្យបានដឹងផង។

៙ អំពីពុម្ពអក្សរ Kh SomborPreyKok (សំបូរព្រៃគុក) ៖

បន្ទាប់ពីមានបទពិសោធន៍ជាមួយពុម្ពអក្សរ Kh KompongThom ដំបូងរបស់ខ្ញុំ វាបានធ្វើឲ្យខ្ញុំរឹងដៃ រឹងជើង ខ្ញុំក៏ចាប់ផ្តើមរកគំនិតបង្កើតពុម្ពអក្សរមួយទៀតពេលនេះលេចចេញជា រូបរាង និងអាចទាញយកទៅប្រើប្រាស់ដោយសេរី។ សូមអគុណមិត្តរបស់ខ្ញុំ "ដឺលុច" ក្នុងការជួយគូរឆ្លាក់ដើម្បីជួយសម្រួលក្នុងការបង្កើតពុម្ពអក្សរមួយនេះ។

Kh SomborPreyKok (ខ្មែរ សំបូរព្រៃគុក) តាមពិតពុម្ពអក្សរនេះមិនមែនជារចនាបថ ឫដកស្រង់ពីប្រាសាទបុរាណមួយនេះទេ។ ដោយសារតែប្រាសាទនេះស្ថិតនៅក្នុងខេត្តកំពង់ធំ ដូច្នេះហើយទើបខ្ញុំសម្រេចចិត្តយកឈ្មោះនេះ មកប្រើ។
ពុម្ពអក្សរនេះវាមានសភាពមិនរលោង និងជាលក្ខណៈសរសេរដោយដៃ ខ្ញុំនឹងចេញជំនាន់ក្រោយមួយទៀតដោយធ្វើឲ្យវារលោងជាងនេះនៅពេល ខាងមុខ។ ប្រសិនជាមានបញ្ហា ឫ មានកំហុសឆ្គងត្រង់ណានោះសូមរាយការណ៍មកកាន់ខ្ញុំដើម្បីកែប្រែ។
ខ្ញុំពិតជាមានសេចក្តីរីករាយណាស់ជាមួយការងាររបស់ខ្ញុំ ទោះបីជាមិនទទួលបានកំរៃមួយកាក់មួយសេនក៏ដោយ ខ្ញុំនឹងព្យាយាមតាមលទ្ធភាពរបស់ខ្ញុំក្នុងការបង្កើតពុម្ពអក្សរ ខ្មែរ ថ្មីៗបន្ថែមទៀត។

៙ អំពីពុម្ពអក្សរ AKbalthom KhmerLer (ខ្មែរលើ) ៖

សួស្ដីប្លកអាក្បាលធំបានយកពុម្ពអក្សរខ្មែរមួយ យកមកតម្រៀបឲ្យទៅជាពុម្ពអក្សរយូនីកូដខ្មែរដែលអាចដើរបានជាមួយ Adobe និង MS Office បានយ៉ាងល្អ។ ពុម្ពអក្សរនោះកាលដើមឡើងជាមួយអក្សរដែលអ្នករចនាគាត់បានបង្កើតវា ដែលដើរលើក្ដារចុចរបស់ថៃ បើតាមខ្ញុំស្មានប្រហែលជាអ្នកបង្កើតនេះជាជនជាតិថៃ ឬក៏ខ្មែរនៅថៃ។ ដោយសារពុម្ពអក្សរនេះដើរលើក្ដារចុចថៃ ធ្វើឲ្យខ្មែរយើងគ្មានអ្នកណាបានប្រើវាទេ ហើយប្រហែលជាមិនដឹងផង តែចៃដន្យអីថ្ងៃមួយខ្ញុំបានចូលមើលគេហទំព័រដែលប្រមូលផ្ដុំពុម្ព អក្សរខ្មែរគ្រប់ប្រភេទ ក៏ប្រទះឃើញថាស្អាតគ្រាន់បើ ហើយណាមួយវាប្រើអត់កើត ក៏យកវាមកធ្វើឲ្យដើរជាយូនីកូដខ្មែរទៅ ដោយមិនបានសុំការអនុញ្ញាតពីម្ចាស់ដើមទេ ព្រោះមិនដឹងនៅទីណា ហើយបើទោះជាដឹងក៏មិនទាក់ទងដែរ :D។

ខ្ញុំគិតថាការយកពុម្ពអក្សរខ្មែរចាស់ៗមកតម្រៀបឲ្យចេញជាយូនីកូដ ខ្មែរ គឺជាកិច្ចមួយល្អ ព្រោះពុម្ពអក្សរចាស់ៗសឹងតែទាំងអស់ឈប់លក់អស់ហើយ ហើយក៏ដល់ពេលដែលត្រូវយកវាមកតម្រៀបជាយូនីកូដខ្មែរហើយដែរ។ ខ្ញុំបានដូរឈ្មោះពុម្ពអក្សរនេះដោយដាក់ថ្មីថា Akbalthom KhmerLer (ខ្មែរលើ) រំលឹកដល់អ្នកបង្កើតនេះដែលនៅថៃ។

អំពីការដូរតួអក្សរខ្លះ ៖

ពុម្ពដើមគេបានប្រើលេខរបស់ថៃ ដូច្នេះខ្ញុំដូរឲ្យទៅជាលេខខ្មែរដោយរចនាថ្មី។
ព្យញ្ជនៈនិងស្រះមិនជាប់គ្នាទេ ដូច្នេះខ្ញុំបានភ្ជាប់សក់ឲ្យជាប់គ្នាទើបសាកសមជាពុម្ពយូនីកូដខ្មែរ។
ពុម្ពដើមមានកម្ពស់ប្រហែល 400 ទៅ 500 , ខ្ញុំបានពង្រីកកម្ពស់ព្យញ្ជនៈឡើងដល់ 1350។